Green Grow the Rashes
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
There's nought but care on ev'ry han',
In ev'ry hour that passes, O:
What signifies the life o' man,
An' 'twere na for the lasses, O.
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
The warly race may riches chase,
An' riches still may fly them, O;
An' though at last they catch them fast,
Their hearts can ne'er enjoy them, O.
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
But gie me a canny hour at e'en,
My arms about my dearie, O;
An' warly cares, an' warly men,
May a' gae tapsalteerie, O!
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
For you sae douce, ye sneer at this,
Ye're nought but senseless asses, O:
The wisest man the warl' saw,
He dearly loved the lasses, O.
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
Auld nature swears, the lovely dears
Her noblest work she classes, O:
Her prentice han' she tried on man,
An' then she made the lasses, O.
Green grow the rashes, O;
Green grow the rashes, O;
The sweetest hours that e'er I spend,
Are spent amang the lasses, O!
|
by Robert Burns (1759-1796)
"Green Grow the Rashes," 1787.
the letter B
Something else (this-a-way)
Something or other (that-a-way)
Out of the Woods
"Wedgwood"
This site copyright (c) by Thomas Bolt.
All rights reserved.
|
|